lundi.mp3

Refrain:
J'vous assur qu'in ville,
L'lindi parjuré
Ch'est, dins chaqu'famille,
Ein jour bin d'siré!

1. A pein' que l'diape a mis ses bottes,
   Tout l'meonte est él'vé dins l'maseon;
   L'mopèr' beot ses trois-quat'chinottes
   Pour erguérir es'n'émotieon;
   Puis v'là tout d'ein queop que l'mamère,
   D'pus longtemps in train d'busier,
   S'adréchant à s'famille intière,
   D'mant':"Quoi ç'qu'on i'rot bin pou souper?..."
   (refrain)
   
   
2. "Mi, j'aim'fell'mint l'pétit'saucisse,
   Dit ein des garcheon, cha ch'est m'goût!"
   "Mi, j'vous assur', dit l'fill'Clarisse,
   Qu'ein morcieau d'vieau ch'est l'meilleu d'tout!"
   Ein éaute infant d'mante ein' cout'lette,
   Mais l'pèr' leu dit:"Cré neom d'ein tchien!
   A Tournai, pou bin fair'cell'fiête,
   L'ceu qui n'a pos d'lapin n'a rien!"
   (refrain)
   
   
3. L'mamèr', tout en chifflant ein'goutte,
   Dit:"Vraimint mopère i-a raiseon!"
   Là-d'sus les v'là tertous in route,
   Chaquein pou s'pétit' commissieon.
   Pindant qu'les infants, au boutique,
   Veont quère ogneons, preones et raisins,
   L'père et l'mère attrap'nt ein' bell' chique
   Tout in marchandant les lapins!
   (refrain)
   
   
4. Pour orvénir de l'Plache Saint-Pierre,
   L'lapin est mis din ein moucheo;
   A chaqu'choncliache i traîn' par tierre
   Et l'tiêt fait soupett' dins l'rucheot!
   L'pourchéeau n's'ingraiss'pos à l'ieau claire:
   Ch'est là l'raisonn'mint d'tous ces gins!
   Au souper, tout l'meont' fait beonn' chère
   Mêm' quand cha croque d'dins leus dints!
   (refrain)
   
   
5. Pindant que s'n'heomm' va boire ein verre,
   In attindant l'moumint d'minger,
   L'feimm',par ein d'ses infants, fait faire
   Les billets qu'i faudra tirer.
   Elle arrinch' tell'mint bin l'affaire
   Qu'nué feos d'sus dix ch'est l'pèr' qui-est seot!
   Ell' troèf' que ch'est l'pus bell' manière
   D'li fair'toudis rimplir el' peot!
   (refrain)
   
   
6. Après l'souper, ch'est dins l'usache,
   On s'réunit in société:
   Nieur de Dieu, mes gins, queu plucache
   A l'bière, au café, au péqué!
   Et puis, quervés comm' des andoules,
   In s'quittant l'lind'main au matin,
   On brondiell'dins tous les bédoules
   In cachant à r'trouver s'quémin!
   (refrain)
   
   
7. Si l'feimme a eu l'bonheur d'êt'Reine,
   Ell' le fait vir d'vant de s'coucher:
   Ell' danse, ell'crie, ell'se démène,
   Ell' menace s'n'heomme' de l'buquer!
   A la fin, ç't'ichi s'fout in rache,
   Mais s'feimm' li dit:"Tais-ta, t'es l'seot!"
   Du queop, v'là la guerre au ménache
   Et la Reine attrape ein claqueot!
   (refrain)